Online Reporter
Ethel Ncube
Ukuqalisa umsebenzi wokufuya inyosi kudinga ukuhlela kuhle, ulwazi kanye lendawo efaneleyo ukuze wenelise ukukwenza lokhu kuphumelele kube libhizimusi elikhulu.
Inhlanganiso ye The Toplife Farming Zone iveze sobala ngokufuya inyosi njalo bachaza ukuthi bayancedisa abalimi abafisa ukufuya inyosi koBulawayo kanye lasezindaweni ezingaphandle kwakoBulawayo.
Uluju yikudla okufunakala nsukuzonke empilweni kazulu ngoba lwenza ukudla okutshiyeneyo njalo abanye balusebenzisa ukwelapha izifuba ezibuhlungu kanye lokunye okutshiyeneyo.
UMnumzana Gerald Tuge owe- The Top Life Farming Zone wethule okudingakalayo ukuze umuntu enelise ukufuya inyosi.
“Umuntu ofuna ukufuya inyosi kumele adinge imikolo yokufuyela inyosi kuqala. Engathola lokho, sokumele athole ulwazi oluphathelane lokufuya inyosi ukuze kufike ethubeni lokuba athole uluju lwakhe.
“Nxa uqalisa kumele uhambe uyefunda mayelana lokugcina inyosi lokuzikhangela kanye lokuba kumele zifuyelwe endaweni enjani. Inyosi lapho oyabe ufake khona imikolo yakho kumele ubone ukuba uyahlanyela amaluba kuphinde njalo kube lezihlala eziyizithingithingi eduzane kwalapho ofake khona imikolo yakho.
“Kumele imikolo uyifake khatshana langekhaya kutshiyane nge 100 metres nxa usuka ngekhaya usiya lapho okulemikolo yakho khona,” kubika uMnu Tuge.
Ubuye waveza ukuba lapho ofake khona imikolo yakho kumele kube kuvikelekile.
“Lapho ofaka khona imikolo yakho kumele ubone ukuba ugombolozele ngocingo ukuba izifuyo zingangeni zibhidlize imikolo yakho. Kumele ufake ibhakane elichaza ukuthi kulenyosi kuleyondawo.
“Ukufuya inyosi libhizimusi elihle kakhulu, abafisa ukuba bafunde ngokufuya inyosi bangaxhumana labe The Toplife Farming Zone silincedise lize libe zintshantshu zokufuya inyosi,” kuphetha uMnu Tuge.
derick.khumalo